Чин бываемый на одеяние рясы и камилавхи
Хотяй прияти рясу приходит ко игумену, и сотворь обычное пред ним поклонение, вопросимь бывает от него, аще со всяким усердием ко иноческому приходит житию, и аще многодневным усмотрением сие предложение неизменное имать; обещавшу же ся ему невозвратно пребыти в монастыри в посте и молитвах, и тщание творити помощию Божиею, еже день и нощь преуспевати в добродетелех и во всех повеленных ему службах, прежде всех повелевает ему чинно прежде изчитати вся согрешения своя, и в память себе привед вся от юности своея содеянная, духовнику монастырскому исповести, и от него разрешение прияти, и по повелению духовникову, готову быти ко причастию Божественных Таин. Сему же сице бывшу, вручает его абие игумен единому от искуснейших старец монастырских, повелевая ему еже опасное о души его имети попечение, и иноческому поучати его житию. Рясоносцу же быти хотящему, повелевает во всем повиноватися старцу, чтити же и послушати его яко отца и учителя, и яко от Христа Самаго от старца наказание приимати, веру же и любовь к нему имети, на всяк же день трикраты изчитати свою совесть опасно, и деяния и помышления своя старцу исповедати всегда, и ничтоже якоже пред Самым Богом никогдаже утаевати, повеления же и поучения старцева якоже от Самаго Бога любовне приимати, и усердно тщатися сохраняти и исполняти; над всеми же сими, ничтоже без повеления и благословения старцева (аще и добрейшее будет дело) творити.
Повелен же от игумена со старцем входит в церковь. Пришедшу же и игумену и братиям в церковь, во время начинания часов, старец предреченный приводит рясу прияти хотящаго пред игуменом, и сотворше ему оба метание, обычно лобызают десницу его, и благословение вземше, творят с обою страну поклонение братиям, и ставше пред Святыми враты, знамением крестным знаменуют себе, кланяющеся трижды. Таже лобызавше святыя иконы, и поклоншеся, отходят на свое место.
Абие же посем начинают часы чести; по скончании же сих, игумен взем епитрахиль и фелонь на ся (предстоят же ему хотяй прияти рясу, и старец его с ним, в притворе пред церковными дверми), творит начало обычное.
- Благословен Бог наш всегда, ныне и присно и во веки веков.
- Братия: Аминь.
Екклисиарх же чтет: Трисвятое. Пресвятая Троице: По Отче наш: игумен: Яко Твое есть Царство:
Екклисиарх же: Приидите, поклонимся: трижды.
И псалом Давидов, прежде помазания, 26:
Господь просвещение мое и Спаситель мой, кого убоюся? Господь защититель живота моего, от кого устрашуся? Внегда приближатися на мя злобующым, еже снести плоти моя, оскорбляющии мя и врази мои, тии изнемогоша и падоша. Аще ополчится на мя полк, не убоится сердце мое, аще востанет на мя брань, на Него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм святый Его. Яко скры мя в селении Своем в день зол моих, покры мя в тайне селения Своего, на камень вознесе мя. И ныне се вознесе главу мою на враги моя, обыдох и пожрох в селении Его жертву хваления и воскликновения, пою и воспою Господеви. Услыши, Господи, глас мой, имже воззвах, помилуй мя и услыши мя. Тебе рече сердце мое: Господа взыщу; взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего, помощник мой буди, не отрини мене и не остави мене, Боже, Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем, и настави мя на стезю правую враг моих ради. Не предаждь мене в душы стужающих ми, яко восташа на мя свидетеле неправеднии, и солга неправда себе. Верую видети благая Господня на земли живых. Потерпи Господа, мужайся, и да крепится сердце твое, и потерпи Господа.
Другий псалом 50: Помилуй мя, Боже:
Потом паки: Трисвятое: и по Отче наш: тропарь, глас 4:
Боже отец наших,/ творяй присно с нами по Твоей кротости,/ не отстави милости Твоея от нас,/ но молитвами их// в мире управи живот наш.
Слава, и ныне, Богородичен:
К Богородице прилежно ныне притецем,/ грешнии и смиреннии, и припадем,/ в покаянии зовуще из глубины души:/ Владычице, помози, на ны милосердовавши,/ потщися, погибаем от множества прегрешений,/ не отврати Твоя рабы тщи,// Тя бо и едину надежду имамы.
Посем абие глаголет игумен молитву сию, диакону рекшу: Господу помолимся: и братиям всем: Господи, помилуй.
- Благодарим Тя, Господи Боже наш, иже по мнозей милости Твоей избавил еси раба Твоего, имярек, от суетнаго мирскаго жития, и призвал еси его на честное сие обещание, сподоби убо его пожити достойно во ангельстем сем житии, и сохрани его от сетей диавольских, и чисту его душу и тело соблюди даже до смерти, и храм свят Твой быти сподоби, вразуми его поминати Тя всегда и Твоя повеления. Смирение же и любовь и кротость даруй ему, молитвами Пречистыя Владычицы нашея Богородицы и Приснодевы Марии, и всех святых Твоих.
Братия же вси глаголют: Аминь.
Диакону же рекшу: Господу помолимся.
И братиям: Господи, помилуй.
Игумен чтет молитву вторую:
- Во иго Твое, Владыко, спасительное приими раба Твоего, имярек, и сподоби его сочетатися пастве избранных Твоих. Облецы его освящения ризою, целомудрием препояши чресла его, всякаго воздержания яви его подвижника, в нем и в нас духовных Твоих благодатей совершая дарование, молитвами Пресвятыя Владычицы нашея Богородицы и Приснодевы Марии, и всех святых Твоих.
Братиям же рекшым: Аминь.
Приемлет игумен ножницы от него, и постризает власы главы его крестообразно, глаголя:
Во Имя Отца, аминь, и Сына, аминь, и Святаго Духа, аминь.
Рцем вси о нем, Господи, помилуй.
Братия же поют вси: Господи, помилуй, трижды.
Посем облачит его игумен в рясу, и камилавху возлагает на главу его, ничтоже глаголя. Облек же его игумен глаголет: Мир всем.
Братия же: И духови твоему. Диакон: Главы ваша Господеви приклоните. Братия же: Тебе, Господи.
Всем же главы преклоншым, чтет игумен тайно молитву сию:
- Святый, Благий, Благаго Отца Сыне, гордыню отсецаяй, и упражняяй борение сопротивнаго, и изливаяй славу смиреномудрия на главу святых, и венчаваяй их неувядаемым и нетленным венцем жизни и безсмертия, и наставляяй в тесный путь, имже внидоша святии отцы, и восприяша самое место покоищное. Ты, Владыко Господи Боже наш, даруй еже от Тебе силу и благодать Твоего Божества, в дух и душу и тело к Тебе пришедшаго раба Твоего, имярек, и приемшаго начаток святаго образа, о имени Твоем освящающем всяческая, да и сего Сам освятиши именем Твоим всесильным и благим.
Возглас: Яко Свят еси, Боже наш, и Тебе славу возсылаем, Отцу и Сыну и Святому Духу, ныне и присно и во веки веков.
Братия: Аминь. Игумен же творит обычный отпуст дневный.
По отпусте же взем за руку приявшаго рясофор, отдает его старцу, глаголя:
-Cе вручаю тебе пред Богом сего новоначальнаго, егоже во страсе Божии и во всех добродетелех жити поучай, блюдый опасно, да не нерадения ради твоего погибнет душа его, имаши бо ответ дати Богу о нем в день Судный.
Ко приявшему же рясофор глаголет:
- Ты же, якоже Христови во всем повинися старцу, и во всем терпелив буди, смирен же, послушлив, кроток, и молчалив, и обрящеши благодать пред Богом, и спасешися.
Текст приводится по изданию:
"Чин на одеяние рясы и камилавхи. Последование малаго образа, еже есть мантия. Последование великаго ангельскаго образа, еже есть схима". Изд. Спасо-Преображенскаго Валаамскаго монастыря, 1998. С. 3–11.
